Fréttir

Í býtið í morgun, föstudaginn 30. nóvember, var óskað eftir aðstoð slökkviliðsins við að dæla olíumenguðum sjó úr flutningaskipinu AXEL sem skemmdist þegar það tók niðri við innsiglinguna við Höfn í Hornafirði í síðustu viku. Skipið liggur við bryggju á Akureyri. Þegar þetta er skrifað hafa 4 slökkviliðsmenn dælt um 100 þúsund lítrum úr lest skipsins síðan í morgun. Dælt er á tanka hjá Olíudreifingu þar sem olían fer í gegnum olíuskiljur.

Rétt fyrir klukkan 5 í dag (17. nóv.) var tilkynnt um eld í fjósi við bæinn Stóra Árskóg í Dalvíkurbyggð.  Strax voru boðuð slökkviliðin á Dalvík og einnig frá Akureyri þar sem ljóst var að um töluverðan eld var að ræða.  Björgunarsveitin á Árskógsströnd var einnig kölluð út enda veður með versta móti, norðan 15-20 m. á sek. og blindhríð.

Lokið var við að heimsækja alla leikskóla á okkar starfssvæði s.l. mánudag. Alls staðar var vel tekið á móti okkur í þessum heimsóknum og ánægja með verkefnið(sjá hér). Farið var yfir hlutverk leikskólanna í því samkomulagi sem skrifað var undir 11. október (sjá hér). Slökkviliðsstjórar á Dalvík og Grenivík óskuðu einnig eftir samvinnu við þetta verkefni hjá þeim og lauk því með heimsókn í leikskólann Leikbæ á Árskógsströnd.  Samtals voru því heimsóknir í leikskóla 21 í tengslum við verkefnið.

Nemendur á atvinnuslökkviliðsmannanámskeiði komu í heimsókn til okkar í síðustu viku og tóku góðan dag í æfingar.  M.a. voru settar upp reykköfunaræfingar í "Hótel Akureyri" sem er gamalt 3 hæða hús í miðbænum sem bíður niðurrifs.  Eftir miklar og erfiðar æfingar þar komu þeir á slökkvistöðina þar sem búið var að útbúa góða þrautabraut úr rörum sem enduðu með góðri salibuni niður rör sem endaði í "sundlauginni" okkar.

Aðalfundur Félags slökkviliðsstjóra var haldinn á Hótel Heklu 26. október sl. Auk aðalfundarstarfa flutti Brunamálastjóri erindi um helstu mál sem "brenna" á slökkviliðsstjórum, umræður voru fjörugar og sýndar voru myndir frá helstu brunum síðasta ár, þ.á.m. Hringrásarbrunanum hér á Akureyri. Á laugardeginum var síðan farið vítt um neðri hluta Árnessýslu og margt skemmtilegt skoðað, t.d. allur slökkvibílafloti svæðissins.

Fyrirtækið Samteigur heimsótti okkur 18. okt. 2007 og kynnti fyrir okkur hitamyndavélar. Með í för var sölumaður frá fyrirtækinu í Þýskalandi og slökkviliðsmaður frá USA sem kynnti notkun vélarinnar, kosti og galla. Kveikt var upp í gámnum okkar til að fá raunverulegar aðstæður.

Sjúkrabílanefnd Slökkviliðs Akureyrar fór á föstudaginn 12. okt. í heimsókn til Sigurjóns Magnússonar á Ólafsfirði sem er að smíða sjúkrabíla fyrir Rauða Krossinn. Teknar voru nokkrar myndir í ferðinni.  Myndir IE.

Slökkvilið Akureyrar og leikskólar svæðisins hófu formlegt samstarf í vikunni með undirritun samkomulags um samstarfsverkefni um eldvarnir og fræðslu. Eignarhaldsfélagið Brunabótafélag Íslands hefur látið útbúa vandað og fjölbreytt efni sem slökkviliðin um land allt geta notað í þessu verkefni. Markmið verkefnisins er þríþætt. Í fyrsta lagi að tryggja að eldvarnir í leikskólum sé ávallt með besta móti. Í öðru lagi að tryggja elstu börnunum fræðslu um eldvarnir og kynna fyrir þeim starf slökkviliðsmanna og búnað. Í þriðja lagi að minna foreldra og forráðamenn barnanna á mikilvægi þess að hafa eldvarnir heimilisins í lagi og veita leiðbeiningar um hvernig ná má því marki.

Mikil námskeiðstörn er nú á haustdögum hjá nokkrum liðsmönnum Slökkviliðs Akureyrar.  Núna eru 3 menn á grunnnámskeiði í sjúkraflutningum (EMT-Basic) sem fram fer á Sjúkrahúsinu á Akureyri á vegum Sjúkraflutningaskólans.  Tveir félagar eru einnig farnir suður til Keflavíkur (varnarsvæði) á 7 vikna námskeið fyrir atvinnuslökkviliðsmenn á vegum Brunamálaskólans.  Í enda október byrjar svo 5 vikna neyðarflutninganámskeið (EMT-I) sem er framhaldsnámskeið fyrir sjúkraflutningamenn.  Fjórir frá SA taka þátt í því námskeiði sem fer fram á Sjúkrahúsi Akureyrar á vegum Sjúkraflutningaskólans.

Sunnudagskvöldið 23. september 2007 fékk Slökkviliðið tilkynningu um eld í bíl við afleggjarann að Kristnesi í Eyjafirði. Þegar að var komið var bíllinn alelda en um var að ræða Corvettu sportbíl en mikið er að plastefnum í yfirbyggingu slíkra bíla til að gera þá léttari. Eins og sjá má af myndum er bíllinn ónýtur.