Manni bjargað úr brennandi húsi
Þegar slökkviliðið kom á staðinn logaði eldur upp úr þaki hússins sem er gamalt timburhús. Reykkafarar fóru strax inn í húsið og fundu mann í svefnherbergi og björguðu honum út. Hann var með einhverja meðvitund en var fluttur með sjúkrabíl á Slysadeild FSA með reykeitrun. Eftir að reykkafarar höfðu leitað af sér allan grun um að fleiri væru í húsinu var farið í að ráða niðurlögum eldsins sem var mestur í þaki hússins. Þurfti að rífa þakið talsvert til að komast fyrir allan eld.
Svo vel vildi til að 5 voru á vakt í kvöld auk eins manns á flugvelli. Ennfremur voru tveir menn staddir á slökkvistöð sem voru á frívakt. Því var strax hægt að senda tvær slökkvibifreiðar auk sjúkrabíls á staðinn og hefja slökkvistörf strax auk þess að flytja manninn sem bjargað var á sjúkrahús.
Líðan mannsins sem bjargað var, er eftir atvikum góð en hann var lagður inn á lyfjadeild FSA til eftirlits í nótt.
Húsið er mikið skemmt og þak þess ónýtt. Talið er að eldurinn hafi kviknað út frá rafmagni.
Auk vaktarinnar voru kallaðar út tvær vaktir til viðbótar auk yfirmanna. Samtals tóku 21 slökkviliðsmenn þátt í slökkvistarfinu í kvöld.